Fleire trafikkulykker og meir alvorleg utfall i 2025
Etter fleire år med positiv utvikling fram til 2023 auka talet på alvorlege trafikkulykker i Møre og Romsdal både i 2024 og 2025. Talet på drepne og hardt skadde steig til 39 i 2025, mot 32 året før, samstundes som talet på lettare skadde auka frå 201 til 240. Utviklinga går dermed i feil retning i høve til målet i Nasjonal transportplan om maksimalt 350 drepne og hardt skadde nasjonalt i 2030.
Ulykkene er ujamt fordelte gjennom året. Sommarmånadene juni, juli og august har flest ulykker, og juni peikar seg særleg negativt ut med 2 drepne og 8 hardt skadde.
Fylkesvegane dominerer framleis ulykkesbiletet. Av 216 ulykker i 2025 skjedde 122 på fylkesveg, og 6 av 7 dødsulykker fann stad her. Dei fleste alvorlege ulykkene skjer på vegar med fartsgrense 80 kilometer i timen, og dei fleste drepne og hardt skadde i 2025 var førarar i personbil. Samanlikna med kor stor del av trafikkarbeidet dei står for er førarar og passasjerar på lett og tung motorsykkel likevel overrepresenterte i alvorlege ulykker, med 4 drepne og 6 hardt skadde, alle menn.
Utforkøyringar er den vanlegaste ulykkestypen, og står aleine for 63 ulykker. Desse ulykkene har òg høg alvorsgrad. Ulykker i motsett køyreretning er færre, men gir ofte alvorlege konsekvensar.
Oppsummert viser utviklinga i Møre og Romsdal at den positive utviklinga gjennom det siste tiåret har snudd dei to siste åra. Auken i talet på drepne og skadde tyder på ei urovekkjande utvikling, særleg på fylkesvegnettet.
I Noreg miste 106 personar livet i trafikken i 2025, ein auke på 19 personar frå året før. Samstundes auka talet på hardt skadde, og totalt vart 751 personar drepne eller hardt skadde i trafikken. Utviklinga i 2025 braut med den positive trenden frå 2024, og talet på drepne og hardt skadde låg betydeleg over målkurva for året.
