Besøkstal
Møre og Romsdal hadde i 2025 totalt 1 881 909 kommersielle overnattingar (hotell, campingplassar, hyttegrender og vandreheimar). Same tal for 2024 var 1 822 674. Dette inneber ein auke på 3,2 prosent frå 2024 til 2025. Norske gjestedøgn auka med 0,5 prosent frå 2024 til 2025 og utgjer 61 prosent (1 148 151) av gjestedøgna for 2025. Det same talet for 2024 var 62,7 prosent. Talet på internasjonale gjestedøgn i 2025 auka med 7,8 prosent (frå 680 517 i 2024 til 733 758 i 2025) og utgjer 39 prosent av totale gjestedøgn. Dette inneber at internasjonale gjestedøgn utgjer ein stadig større del av totale gjestedøgn i Møre og Romsdal og at auken frå 2024 til 2025 hovudsakleg kjem frå internasjonale gjestar.
Det har i fleire år vore arbeidd målretta med sesongforlenging. Det er derfor gledeleg å registrere at trafikken også aukar i månadane april, mai, september og oktober. April og mai auka med 1,3 prosent frå 2024 til 2025. September og oktober auka med 3,4 prosent frå 2024 til 2025 som er høgare enn veksten for heile 2025 samanlikna med 2024.
Tal for perioden januar – juli 2026 viser ein nedgang i samla tal overnattingar på 1,5 prosent (frå 1 143 852 i 2025 til 1 160 923 i 2026) samanlikna med same periode i 2025. Dersom ein ser på berre tala for juli månad, viser dette ein nedgang på 6,4 prosent frå juli 2025 til juli 2026. Det er vanskeleg å fastslå kva som kan vere årsaka til denne nedgangen, men ein kan sjølvsagt spekulere i om veret kan vere ein medverkande årsak.
Tyskland er framleis den viktigaste marknaden for fylket. I 2025 innebar dette 220 658 gjestedøgn (nedgang på 3,5 prosent). Nytt er at USA har segla opp som den nest viktigaste utanlandske markanden for fylket med 63 512 gjestedøgn (auke på 22,5 prosent frå 2024), foran Sverige med 60 663 (auke på 5 prosent) og Nederland med 60 059 gjestedøgn (auke på 8,4 prosent).
Verdiskaping
Reiselivsnæringa i Møre og Romsdal hadde i 2024 ei verdiskaping på totalt 4,3 milliardar kroner. Dette er ein auke frå 2023 på heile 12,4 prosent (frå 3,8 milliardar i 2023). Transportsektoren hadde den største verdiskapinga med 1,8 milliardar kroner, etterfølgd av serveringssektoren som hadde ei verdiskaping på 980 millionar kroner og overnattingssektoren som hadde ei verdiskaping på 841 millionar kroner.
Vestland hadde til samanlikning ei verdiskaping på 16,4 milliardar kroner i 2024 og Rogaland ei verdiskaping på 9,4 milliardar kroner. Marknadsføring av Vestlandet internasjonalt skjer hovudsakleg gjennom vårt felles landsdelselskap Fjord Norge AS.
