For å ta gode avgjerder i samfunnsplanlegginga treng vi brei kunnskap. Dette er særleg viktig i ei tid med raske endringar og uvisse rundt oss. Skal kommunane og fylkeskommunen lukkast med å utvikle gode planar og tenester, må vi ha eit oppdatert og påliteleg bilete av samfunnsutviklinga.
I årets fylkesstatistikk er det nokre tema som utmerkar seg. Som vanleg er demografi og endringar i befolkningssamansettinga godt dekt. Utanforskap er eit anna viktig tema som går att i fleire av artiklane, og som viser kva utfordringar vi må løyse i fellesskap. I tillegg er spørsmål knytte til landbruket i fylket breitt behandla i årets utgåve.
Årets statistikk set òg søkelys på trafikksikkerheit, med særleg merksemd på talet på døyde og hardt skadde på vegane våre. Dette minner oss om det kontinuerlege arbeidet som krevst for å tryggje kvardagen til innbyggjarane. Det er også fleire artiklar om kulturfeltet og utviklinga innan denne sektoren, som også er viktig for samfunnets motstandskraft.
Statistikkgrunnlaget er resultatet av eit godt samarbeid på tvers av avdelingane i Møre og Romsdal fylkeskommune og Statsforvaltaren i Møre og Romsdal. Ved å samle kunnskapen vår på denne måten, håpar vi å gi eit nyttig verktøy til politikarar, planleggjarar og innbyggjarar.
Ta gjerne kontakt med oss på statistikk@mrfylke.no om du har spørsmål eller kommentarar til Fylkesstatistikk 2026.